Hyttetur til Hjartholm, Ytre Sogn

Helga 27. – 29. oktober inviterer Tråkk Bergen til hyttetur i Hjartholm i Ytre Sogn. Her er det fin natur og flotte område for ulike turar som kan tilpassast etter korleis véret er.

Vi har leigd to moderne hytter som ligg rett ved sjøkanten. Den ein hytta har sauna, og det vil vere mogleg å bruke den og ta eit bad i Sognefjorden for dei som ynskjer det.

Det blir lagt opp til turar både på laurdag og på søndag. Søtekollen, ein flott utsiktstopp ved Brekke der ein i klart vér ser både utover og innover Sognefjorden, er turmålet den eine dagen. Den andre turen er ein rundtur opp Breidvikdalen til Langevatnet og ned Breiddalen. Ved Breidvikstølen er det gapahuk og bålpanne, og det ligg kano som ein kan bruke. Dei som vil gå ein kort tur kan snu her og gå same veg tilbake.

Denne hytteturen er for deg som vil bli kjent med nye og gamle tråkkarar, oppleve haust ved verdas lengste opne fjord, nyte naturen og vere saman med andre friluftsglade i eit kristent fellesskap.

Det blir samkøyring i privatbilar. Avreise frå Bergen fredag ettermiddag ca. kl. 16.30-17, og vi reknar med å vere tilbake i Bergen seinast kl. 18 søndag kveld.

Stad: Hjartholm feriehytter, Gulen kommune

Plassar: 14

Pris: Betal 1000,- kr til konto 1503.02.47024 når du melder deg på. Køyrepengar kjem i tillegg, og taksten er 3,5 kr pr. km delt på personar i bilen. Dette betalar du direkte til sjåføren.

Deltakaravgifta dekker overnatting frå fredag til søndag, varm kvelds fredag, frukost og lunsj (matpakke) lørdag og søndag, og middag laurdag kveld. Gje beskjed om allergiar ved påmelding.

Påmelding via skjemaet på denne nettsida. Vi opnar påmeldinga søndag 17. september klokka 20.00 og stenger tirsdag den 17. oktober klokka 20.00.

Dersom turen blir full før fristen kan du sette deg på venteliste. Då vil vi vurdere om vi skal leige ei hytte til for å utvide talet på plassar.

Meir informasjon om avreise, pakkeliste og liknande blir sendt ut til deltakarane når turen nærmar seg.

Ta kontakt med Jan Halvard på tlf. 958 13 721 dersom du har spørsmål.