Topptur til Svinningen (840 m.o.h.) i Os

Velkomen med på topptur til Svinningen (840 m.o.h.) 16. september!

Svinningen er den høgaste toppen i tidlegare Os kommune. Dersom vêret viser seg frå si beste side, lovar me storslagen utsikt mot Fusa, Samnanger og Folgefonna i aust, Bjørnafjorden, Tysnes og Kvinnherad i sør, og Gullfjellet og Byfjella i Bergen i nord.

Turen startar og endar ved parkeringsplassen i Øvredalen, som ligg ved Samnangerfjorden. Me køyrer i privatbilar til denne. Skriv i påmeldinga til turen om du kan stilla med privatbil, eller om du treng skyss. Sjølve turen er gratis, men passasjerar betalar 3,50 kr per km i køyregodtgjersle til sjåføren.

Oppmøte ved innfartsparkeringa til Skyss ved Esso bensinstasjon i Skjoldskiftet kl. 10:00. Derifrå køyrer me til parkeringsplassen i Øvredalen.

Den første delen av turen går i skogsterreng. Her vil me møta på visdomsord og andre hyggjelege overraskingar frå kunstnar og poet Jimmy Øvredal, som bur i området. Når me kjem over tregrensa, får me flott utsikt mot Øvredalen. Herifrå startar stigninga til toppen, som tidvis er svært bratt.

Turen til Svinningen er klassifisert som krevjande, grunna dei mange høgdemetrane – om lag 811 – me skal gå kvar veg. Distansen tur/retur er om lag 10,7 km. Det er difor viktig at dei som melder seg på turen har turerfaring og svært god utholdenhet. Påmelding åpner 01.09 kl 21 

NB! Skulle det bli skodde eller dårleg vêr denne dagen, er plan B å ta turen til Møsnuken (639 m.o.h.) via Linken (479 m.o.h.). Dette er ein tur på om lag 10 km tur/retur. For å koma seg til startpunktet for denne turen, parkeringsplassen på Tøsdal i Os, kan ein ta rutebuss til Tøsdalsskiftet. Kva for ein av desse turalternativa det blir, vil bli avgjort eit par dagar før, og deltakarar som er påmeldt vil få melding dersom vi vel å gå for plan B.

Ta på/med gode (og inngåtte!) tursko, turklede som passar til vêret, mat og rikeleg med drikke, sitjeunderlag og enkelt førstehjelpsutstyr – og godt humør.

Turleiar er Maria Sørhus. Tråkk Bergen er takknemlig for at Eirik Grimstad stiller som kjentmann.

For spørsmål, ta kontakt med turleiar Maria Sørhus på tlf. 45 42 96 10, eller e-post (sorhusmaria@gmail.com).