Vereide i Nordfjord

Tråkk sommartur er for mange eit av sommarens høgdepunkt. Søndag 23. juli til laurdag 29. juli samlast vi i Nordfjord til naturopplevingar og kristent fellesskap. Nordfjorden er Norges sjette lengste fjord, går frå kysten og heilt inn til Jostedalsbreen. Her har vi et supert utgangspunkt for turar mellom fjord og høgt til fjells.

Leirplassen

I år har vi lagt sommarturen til Nordfjord folkehøgskule på vakre Vereide, i Gloppen kommune. Her bur vi i telt på jordet rett over gjerdet frå skulen, og her lagar vi maten på stormkjøkken ved telta, eller på ein stor felles spiseplass med tak over. Om du ikkje er så erfaren på verken telt eller matlaging, er det lurt å slå seg saman med andre. Planlegg gjerne middag med dei du går tur med på dagen, det er ofte ein suksess.

På skulen har vi garderober og dusjar, gymsal til kveldssamlingar, ei flott gamal storstove til kafé, og plass til mykje sosialt på kveldstid. Ute har vi bålplass. Ein konsentrert camp, slik vi og hadde det i Sykkylven i 2016. Skulle vi få nokre dråpar når vi er ute på tur, står tidenes tørkerom klart. 

Folkehøgskulen ligg i naturskjønne omgjevnadar, 5 km frå kommunesenteret Sandane. Der finn ein fleire matbutikkar, sportsbutikkar, apotek, og eit godt utval for dei fleste.

Korleis reise til Vereide?

Med bil ligg Vereide snaue 4 timer fra Bergen og drygt 6 timer fra Oslo. 4 kilometer vest ligg Sandane Lufthamn med daglege flygingar til og frå Oslo. Fjordekspressen frå Bergen, eller Nettbuss frå Oslo, tar deg langt på veg i retning Sandane. Ofte er det mange som køyrer frå dei større plassane i Norge, bruk gjerne lokallaga sine facebooksider til å spørre etter skyss til sommarturen.

Turområdet

Vereide ligg i grensa mellom kyst og innland. Innafor ein times køyring frå leirplassen finn ein fjelltoppar på snaue 1800 meter, brearmar frå Josten og fleire kjente turmål. Snaue 500 meter frå campen ligg Gloppenfjorden, ein sidearm til Nordfjorden, kald og frisk og ventar på deg. Frå leirplassen kan vi gå rett til fjells til Haugsvarden på 850 meter og enda lenger opp. Her kan du og gå rolegare dagsturar rett fra leirplassen.

I Nordfjord reklamerer dei: “Nordfjord – alt i ein fjord. I Gloppen seier dei at “Gloppen er toppen!” Vi trur vi skal få oppleve begge deler i sommar.

Programmet

Kvar dag reiser vi ut på tur. Måndag, tirsdag, torsdag og fredag er det fleire turar å velje mellom. Der er turar på alle nivå, frå lette turar på traktorvegar, til krevjande turar på høge fjell nær kvitlagde brear. På nokre turar går vi rett frå leirplassen, på andre må vi køyre før vi begynner å gå. Alle turane startar med oppmøte på leirplassen, og vi koordinerer køyringa. Du treng altså ikkje ha med eigen bil for å kunne vere med. Leirplassen ligg like ved fjorden og dei som ynskjer skal få prøvd seg i kajakken.

På kvar tur er der mellom fem og tretti plassar. Påmeldinga til dei fleste turane skjer kvelden før. Enkelte krevjande turar som krev innleigde guidar, vil ha påmelding i forkant.

På onsdagen er det fellestur med friluftsgudsteneste. I år går denne turen til Tystadstøylen, omlag halvanna times gåtur frå leirplassen. Etter fellesturen har vi felles grilling på leirplassen

Kvar kveld er det tid til åndeleg og sosialt fellesskap, med kveldssamlingar, bålkos og kafé. To av dagane er der og dans, onsdag blir det og swingkurs.

Og om du synast dette verkar travelt… Så er det heilt lov å ta seg ein fridag på leirplassen, sitte i campingstolen utafor teltet ditt – eller utanfor eit anna telt du finn det triveleg å sitte utanfor – og berre kjenne …. at no sit du …. akkurat der. Medan sola flyttar seg i ring rundt deg, og du skal ingen stad.

Pris og påmelding

Du melder deg på sommarturen ved å fylle ut påmeldingsskjemaet som du finn under fana “Påmelding”. Dersom du betaler før 12. juni er påmeldingsavgifta 1500 kr. Etter dette aukar den til 1800 kr.

Betal til kontonummer: 9680.39.61864
(merk betalinga med namn på deltakar og Sommartur 2017)

IBAN-nr. NO33 9680 3961 864
BIC: STFBNOKKXXX

Storebrand Bank
Professor Kohts vei 9
1366 Lysaker

–

Tråkk sommartur er eit godt høve til å kople av i kvardagen og kople på deg sjølv. Her kan du få  gode naturopplevingar, nye (eller ditt første) møte med Gud og andre kristne, og du kan bli kjent med nye vener.

Velkommen til Tråkk sommartur 2017! Hugs å melde deg på 4. mai kl 09:00!

Leirsjefar i år er Hildegunn Vikebø, Ellinor Kvamen og Audun E. Ekroll. Saman med dei er over 20 personar frå Tråkklaga med å arrangere sommarturen.