TUR

I år skal vi til Skjolden, heilt innerst i Sognefjorden. I Luster dyrkar dei god tobakk heiter det, og det tørre og milde klimaet passar også veldig godt til turbruk! Om vêret klaffar, er det uansett berre ein bonus på toppen av det flotte landskapet, frå fjord til høgfjell!

Vi planlegg eit variert utvalg fotturar så det skulle vere noko som kan passe dei fleste. Det vert kortare turar i rolig tempo og meir spektakulære eggar som må sikrast med tau, og turar både i låglandet og godt over 2000 meter, heilt opp til Noregs tak. I tillegg kan det vere mogeleg å bli med på bretur, padling, stisykling eller klatring.

Mandag, tirsdag, torsdag og fredag er det turar med påmelding kvelden før, dei aller fleste har 15 deltakarar i tillegg til to turleiarar. Unntaket er turar som krev ekstern guide eller anna planlegging, her vert det påmelding på nettsida på førehand.

På onsdag vert det fellestur med friluftsgudsteneste. Så tirsdag kveld kan du slappe av med at det ikkje er nokon valg som må takast til neste dag.

Vi gler oss til å sjå deg i Skjolden og trur du vil finne mange turar som freistar!